HOTUBA
RAIS WA ZANZIBAR NA MWENYEKITI WA BARAZA LA MAPINDUZI; MHESHIMIWA DK. ALI
MOHAMED SHEIN,
WAKATI
WA UFUNGUZI WA MKUTANO WA KWANZA WA KAMATI
YA
MAWAZIRI WENYE DHAMANA YA MENEJIMENTI YA MAAFA
KWA NCHI
WANACHAMA WA JUMUIYA YA MAENDELEO
KUSINI
MWA AFRIKA, MADINAT AL BAHR - ZANZIBAR
21
FEBRUARI, 2020
Mheshimiwa
Balozi Seif Ali Iddi, Makamu wa Pili wa Rais wa Zanzibar,
Mhesimiwa Zubeir
Ali Maulid, Spika wa Baraza la
Wawakilishi Zanzibar
Mheshimiwa,
Jenista Mhagama, Waziri wa Nchi, Ofisi ya Waziri Mkuu, Sera, Bunge, Kazi,
Vijana, Ajira na Walemavu;
Mheshimiwa
Mohamed Aboud Mohamed, Waziri wa Nchi, Ofisi ya
Makamu wa Pili wa Rais,
Waheshimiwa Mawaziri
Mliohudhuria hapa,
Mheshimiwa, Dkt.
Stergomena Lawrence Tax, Katibu Mtendaji, Jumuiya ya Maendeleo Kusini Mwa Afrika;
Mheshimiwa, Dkt
Thembinkosi Mhlongo, Naibu Katibu Mtendaji, Jumuiya ya Maendeleo Kusini Mwa Afrika;
Naibu Katibu
Mkuu wa CCM Zanzibar, Abdallah Juma Mabodi;
Ndugu
Makatibu Wakuu;
Ndugu
Manaibu Makatibu Wakuu;
Washiriki wote
wa Mkutano huu;
Ndugu
Waandishi wa Habari;
Mabibi na Mabwana,
Assalam Aleikum,
Namshukuru Mwenyezi Mungu, Muumba wa kila
kitu, kwa kutujaaliya afya njema na kutuwezesha kuwepo hapa kwa ajili ya kufanya Mkutano huu
wa Kamati ya Mawaziri wa Jumuiya ya Maendeleo Kusini mwa Afrika (SADC), wenye
dhamana ya Menejimenti ya Maafa. Natoa shukurani zangu za dhati kwa Kamati ya Maandizi ya Mkutano huu kwa
mafanikio makubwa. Naithamini sana heshima hii kubwa mliyonipa ya kuwa Mgeni
Rasmi wa Mkutano huu. Ahsanteni sana.
Serikali ya Jamhuri ya Muungano wa Tanzania na
Serikali ya Mapinduzi Zanzibar, zimejiandaa vizuri kwa ajili ya kuhakikisha
kuwa mkutano huu muhimu unafanyika kwa ufanisi mkubwa. Kwa niaba ya wananchi wa
Zanzibar, natoa shukurani za dhati kwa Uongozi wa Kamati ya Maandalizi na
uongozi wote wa SADC kwa kuichagua Zanzibar kuwa mahali pa kuufanyia mkutano
huu. Kwa hakika uamuzi wenu wa kuja
Zanzibar kuufanya mkutano huu, unatoa fursa nzuri kwa wananchi wa Zanzibar
ya kuyafahamu kwa undani zaidi majukumu na umuhimu wa Jumuiya ya SADC.
Tunakukaribisheni Zanzibar nyote wageni waalikwa
kutoka nchi mbali mbali. Itumieni vizuri fursa hii ya kushiriki katika mkutano
huu, kwa kufanya ziara za matembezi, ili muone mandhari nzuri ya Zanzibar,
vivutio vya utalii, fukwe zilizopo na maeneo mbali mbali ya historia pamoja na
Mji Mkongwe, ambao ni urithi wa Kimataifa. Zanzibar ina historia kubwa yenye
kuwavutia wageni kutoka mataifa yote duniani, ambayo imekuwa ikijulikana na
ikipendwa kwa uzuri wake wa kimaumbile, ucheshi na ukarimu wa watu wake pamoja
na ustaarabu wa kuishi kwa kushirikiana na kuvumiliana mambo yaliyodumu tangu
kale na dahari.
Zanzibar
hivi sasa ni miongoni mwa nchi na vituo maarufu vya kufanyia mikutano,
semina na makongamano ya Taasisi za Kimataifa. Naamini kwamba Jumuiya ya SADC pamoja na taasisi mbali mbali za Serikali na zile za
binafsi zilizo katika umoja huu zitaendelea kufanya mikutano yao Zanzibar kwa
kuzingatia sifa ilizonazo na huduma
zinazotolewa na hoteli zilizopo hapa, kama
hii ya Madinat Al Bahr. Tuzingatie hekima ya usemi maarufu wa Kiswahili
usemao ‘Mramba asali harambi mara
moja’. Kwa hivyo, safari hii
mliokuja isiwe mwisho, bali muwe mnakuja mara kwa mara, hata kwa kupumzika na
familia zenu. Zipo hoteli za kila daraja
zenye kutoa huduma bora kwa bei nafuu, kwa kampuni na familia mbali mbali. KARIBUNI
SANA.
Ndugu Washiriki,
Nimevutiwa
sana na ajenda kuu ya Mkutano huu iliyomo kwenye kaulimbiu isemayo: "Ushiriki wa kisekta kwenye kupunguza madhara ya maafa ni
njia bora ya kujenga uhimili katika ukanda wa nchi wanachama wa Jumuiya ya
Maendeleo Kusini mwa Afrika.” Hapana shaka
tangu mkutano huu ulipoanza, tarehe 18 hadi leo, masuala mengi muhimu
yanayohusu maafa tayari
yameshajadiliwa kwa kuzingatia Kaulimbiu
hii.
Ilivyokuwa maafa
ni matukio yanayoleta hasara kubwa kwa taifa lolote kutokana na majanga yanayoambatana nayo, ajenda na kauli
mbiu ya mkutano huu zimesadifu sana katika lengo kuu la mkutano huu. Mijadala
iliyofanywa na itakayoendelea hivi leo, yote imelenga katika kulifanikisha
lengo hilo, katika hali ya kuimarisha
ushirikiano na kuchochea ari na juhudi zilizopo, ili kupambana na kupunguza athari za maafa. Mkakati wa
Kujiandaa na Kukabiliana na Maafa wa Kikanda wa mwaka 2016 - 2030, pamoja na kuridhia Mfumo Mkakati wa Kuhimili Maafa wa Kikanda wa mwaka 2020 - 2025,
mtakayoijadili katika mkutano huu, ni mambo
muhimu. Umuhimu wake upo katika utekelezaji wa mipango ya kuhimili maafa ya kitaifa na ya Kimataifa
inayoendelea kutekelezwa na nchi wanachama, ukiwemo Mkakati wa Sendai wa
Kupunguza Madhara ya Maafa wa mwaka 2015 - 2030
(The Sendai Framework for
Disaster Risk Reduction 2015–2030), uliojadiliwa mjini Sendai - Japan na baadae ukapitishwa na Baraza Kuu la Umoja wa Mataifa
mwaka 2015.
Vile vile, naamini kwamba mazungumzo yaliyofanyika kwa
lengo la kujenga mustakbali mwema juu ya masuala mbali mbali yanayohusu
matumizi ya Mfuko wa Fedha za Ufadhili wa Mabadiliko ya Tabianchi, yamefikia
hatua nzuri na maazimio yatakayopitishwa yatanzingatia maslahi ya nchi
zote wanachama na maendeleo ya SADC kwa jumla.
Mkutano huu ni
muhimu, tukijua kwamba washiriki nyote
mna uwezo na ushawishi mkubwa katika
nchi zenu wa kuyaingiza masuala ya kukabiliana na maafa katika
mipango ya maendeleo, mipango ya
kisekta, miradi inayofadhiliwa na wahisani mbali mbali pamoja na mipango mengine ya kiutawala. Mmepewa
dhamana ya kuyashughulikia masuala yanayohusu maafa,yanayosimamiwa na Jumuia
hii, kutokana na sifa zenu maalum mlizonazo. Sifa ambazo zimeonesha umahiri, uwezo na uzoefu wenu mkubwa katika
kupanga na kuitekeleza mikakati ya kujiandaa, kukabiliana na kuirejesha
hali ya maisha ya wananchi baada ya
kukumbwa na maafa; pamoja na kujikinga
na kupunguza matukio ya maafa.
Ndugu Washiriki,
Kufanyika kwa
Mkutano huu ni hatua muhimu katika kujenga matumaini mapya ya wananchi
kuhusiana na maafa, tukizingatia kwamba katika miaka ya hivi karibuni kumekuwa na ongezeko kubwa la maafa pamoja na viashiria vyake
katika nchi wanachama wa SADC. Maafa hayo yanatokana na matukio mbali
mbali ya kimaumbile na yasiyokuwa ya kimaumbile yakiwemo yale ya vimbunga na
dhoruba, matetemeko ya ardhi, ukame, moto wa misituni, mafuriko, miripuko ya maradhi na ajali za baharini na barabarani. Matukio mengine husababishwa na wadudu
waharibifu wa mazao, uchafuzi wa mazingira, ongezeko la kina cha bahari,
uvamizi wa maji ya chumvi na matukio mengine yanayosababishwa na mabadiliko ya tabia nchi na matumizi mabaya ya
rasilimali tulizojaaliwa. Maafa yanayotokana na mambo yote hayo husababisha
upotevu wa maisha, mali za watu na uharibifu wa miundombinu; na hivyo
yanaathiri sana ajenda za maendeleo zinazopangwa kutekelezwa na nchi zetu.
Ndugu Washiriki,
Takwimu za utekelezaji wa “Mkakati wa Sendai”
zinaonesha kuwa kati ya mwaka 2015 na 2018, Ukanda wa SADC umepata zaidi ya
matukio 160 ya maafa. Maafa hayo yalisababisha vifo vya watu zaidi ya 20,000,
na yameathiri watu milioni 22. Kadhalika, maafa hayo yalileta uharibifu mkubwa,
ambao gharama zake zilikadiriwa
kuwa ni
Dola za Kimarekani bilioni 3.7.
Athari mbaya za matukio ya maafa haziko katika gharama za kifedha tu
zinazotumika, bali zina madhara makubwa
ya kisaikolojia kwa jamii zilizoathirika. Tunapoangalia upande wa hasara
kifedha, tutaona kwamba gharama ya Dola za Kimarekani bilioni 3.7. ni kubwa,
tukizingatia kwamba bado nchi zetu zinahitaji fedha kwa ajili ya kuendeleza ujenzi wa miundombinu
mipya badala ya kuijenga tena ile iliyokuwa imeshajengwa. Nchi zetu zinahitaji
fedha katika kuimarisha huduma za afya, elimu, maji safi na salama, kilimo,
elimu, ujenzi wa miundombinu na uwekezaji katika nyanja mbali mbali za kiuchumi
na kijamii.
Kwa hivyo, kwa kuzingatia athari za maafa
zinazogharimu maendeleo ya kiuchumi na kijamii katika nchi zetu, ni lazima
Jumuia ya SADC iwe na mipango na mikakati imara ya kupambana na maafa, hasa yale yanayotokea
mara kwa mara. Kwa hivyo, ni lazima
tujipange vizuri kwa kuandaa mikakati
imara ya kuvitambua na kuviwahi viashiria vipya vya maafa kila vinapoanza
kujitokeza. Kwa mfano, Kamati hii ina
nafasi ya kutoa maelekezo na mapendekezo juu ya nini kifanyike kwa ngazi ya kitaifa na kikanda, ili tuweze kujikinga na
maradhi mapya yaliyoingia ya Virusi vya Corona (Covid-19),
ambayo tayari yameshaenea katika nchi mbali mbali. Ni lazima tuwe na mipango ya kukabiliana nayo
katika kila hali. Vile vile, changamoto ya nzige iliyojitokeza
hivi karibuni katika ukanda wa Afrika Mashariki, ambao wanaweza kuathiri kwa
kiasi kikubwa sekta ya kilimo na usalama
wa chakula katika baadhi ya nchi, ni
suala ambalo linahitaji kuzungumzwa na kupangiwa mikakati ya pamoja. Wahenga
wanasema Tahadhari kabla ya athari.’
Naamini kwamba haya ni miongoni mwa majukumu ya Kamati hii inayoshughulika na masuala ya maafa.
Ndugu
Washiriki,
Ni dhahiri kwamba, katika muda huu wa siku nne, washiriki katika ngazi mbali mbali
mmepata muda wa kutosha wa kujadili na
kubainisha uzoefu katika masuala na
matukio mbali mbali yanayohusu maafa. Vile vile, tumemsikia
Mheshimiwa Jenista Mhagama, Waziri wa Nchi, Ofisi ya Waziri Mkuu, Sera,
Bunge, Kazi, Vijana, Ajira na Walemavu, alivyoelezea matukio
mbali mbali ya maafa
yaliyotokezea katika nchi za SADC na atahari
zake kwa maendeleo ya kiuchumi na
kijamii kwa nchi wanachama.
Kwa hivyo, itakuwa ni vyema na mimi nikaelezea
angalau kwa ufupi juu ya juhudi na
mipango ya Serikali yetu ya Mapinduzi ya
Zanzibar katika kukabiliana na maafa. Kabla sijatoa maelezo yanayohusu
Zanzibar, nataka niseme kwa jumla juu ya uzoefu katika changamoto zinzozikabili
nchi za visiwa.
Ndugu
Washiriki,
Mara nyingi watu wanaoishi katika visiwa wamo
hatarini zaidi ya kukabiliwa
na maafa, hasa katika wakati huu ambapo
dunia imekabiliwa na changamoto nyingi zinazotakana na mabadiliko ya
tabianchi. Miongoni mwao ni ongezeko la
kina cha maji ya bahari, jambo ambalo linasababisha maeneo mengi kuvamiwa na maji ya chumvi, na hatimae
kuathiri makaazi na shughuli za kilimo.
Baadhi ya wakati, wananchi wanapoteza maisha yao kwa usafiri wa baharini na shughuli za
uvuvi hasa unapotokea upepo mkali na
kimbunga. Hivi sasa, visiwa vingi
vina changamoto ya ongezeko la idadi ya
watu ambalo haliendani na mahitaji ya matumizi ya ardhi, hali ambayo
inawafanya baadhi ya wananchi waanzishe makaazi na shughuli zao za maendeleo
katika maeneo yaliyokuwa hayakutengwa na yanakaliwa kinyume na sheria. Kwa hivyo, naamini kwamba masuala ya aina hii
yatazingatiwa na kuwekewa mikakati madhubuti zaidi ya kisera na kisheria kwa
ajili ya kuzitatua changamoto zilizojitokeza, ili hatimae tuweze kuwanusuru
wananchi kutokana na maafa yanayoweza
kutokea.
Ndugu
Washiriki,
Kwa upande wa Zanzibar,
Serikali ya Mapinduzi ya Zanzibar imekuwa ikipanga na kutekeleza mikakati mbali
mbali ya kukabiliana na maafa. Serikali iliandaa Sera ya
Kukabiliana na Maafa ya mwaka 2011, na baadae ilitunga Sheria ya Kukabiliana na Maafa Nam 1 ya mwaka
2015 ambayo ilipelekea kuanzishwa kwa Kamisheni ya Kukabliana na Maafa ya
Zanzibar. Vile vile, Serikali
imeandaa Mkakati wa Mawasiliano Wakati
wa Maafa na Mpango wa Kujiandaa na Kukabiliana na Maafa katika ngazi ya Kitaifa
na Wilaya. Sambamba na juhudi hizo, Serikali imeanzisha
kituo cha Operesheni na Mawasiliano ya Dharura ‘Emergency Operation and
Communication Centre’ kilichopo eneo la Maruhubi Unguja. Vile vile, juhudi
kubwa za
kutoa elimu zinaendelea kufanywa,
ili kuwapa wananchi uwezo mkubwa wa
kujiandaa na kukabiliana na maafa. Elimu hio inatolewa kupitia Vyombo vya Habari vya Serikali na vya
Sekta Binafsi, mikutano ya kijamii, semina na makongamano mbali mbali.
Kadhalika, elimu imekuwa ikitolewa juu ya tahadhari za mapema kwa majanga
mbalimbali yanayoweza kuikumba jamii yetu, ikiwemo athari za mvua kubwa na
upepo mkali. Kadhalika, Serikali imeimarisha shuguhuli za kufanya ukaguzi
katika maeneo tafauti kwa ajili ya kuangalia mipango na taratibu za kukabiliana
na maafa. Maeneo yaliyokaguliwa ni pamoja na vyombo vya usafiri, hoteli,
majengo ya umma, vituo vya kuuzia mafuta na gesi na maeneo yenye kukumbwa na mafuriko
ya mara kwa mara.
Ndugu
Washiriki,
Shughuli za uvuvi na usafiri wa baharini ni sehemu
muhimu ya maisha ya wananchi wa Zanzibar, kama ilivyo katika visiwa
vyengine. Shughuli hizi baadhi ya wakati
huambatana na ajali mbali mbali. Miongoni mwa ajali kubwa za meli zilizotokea
Zanzibar na zilizoacha athari isiyosahaulika kwa wananchi wa Zanzibar ni ajali
ya kuzama meli ya “MV Spice Islander” katika eneo la Nungwi - Zanzibar mwaka
2011, na ajali ya kuzama kwa meli “MV
Skagit” mwaka 2012. Baada ya maafa haya makubwa,Serikali iliongeza nguvu kubwa
za kujikinga na ajali za baharini.
Katika hatua za kujikinga na majanga kama hayo,
Serikali iliandaa mikakati maalum ya kuimarisha huduma za usafiri wa
baharini pamoja na kuishajiisha sekta
binafsi, ili nayo iwekeze kwa kununua
vyombo vya baharini. Serikali imenunua meli mbili za kisasa, Mv.
Mapinduzi II kwa ajili ya kuimarisha usafirishaji wa abiria na MT Ukombozi II
kwa ajili ya usafirishaji wa mafuta. Wawekezaji wazalendo nao wamehamasika katika kuziunga mkono
jitihada za Serikali za kujilinda na kupunguza matukio ya maafa baharini, kwa
kununua boti za abiria za mwendo kasi za
kisasa pamoja na meli za abiria na
Mizigo, ili zitumike pamoja na zile zilizokuwepo awali. Hivi sasa, tumepiga hatua kubwa katika kuimarisha
usafiri wa baharini, jambo ambalo limewapelekea watalii na wageni wengi
wanaopenda kuja Zanzibar kutoka Tanzania Bara kutumia usafiri wa baharini badala ya
usafiri wa anga. Naamini kwamba
baadhi yenu mmetumia usafiri wa baharini
wakati mliposafiri kuja kwenye mkutano huu, na mmejionea wenyewe ubora wa
vyombo mlivyosafiria.
Ndugu
Washiriki,
Pamoja na ununuzi wa vyombo vya kisasa vya
usafirishaji wa abiria, mizigo na mafuta, Serikali imejenga vituo vitatu vya
uokozi (rescue centers) vinavyosimamiwa na Kikosi Maalum cha Kuzuia Magendo
(KMKM), katika eneo la Nungwi na Kibweni kwa Unguja pamoja na Mkoani kwa upande
wa Pemba, ili tuwe na uwezo mkubwa zaidi wa
kutoa huduma za uokozi na kwa haraka, pale ambapo huduma hizo
zitahitajika. Vile vile, Serikali imenunua mitambo mbali mbali na ndege zisizo na rubani (drones), ili kuweza
kujua hali ya usalama wa meli na vyombo
vya baharini vilivyopo au vinavyopita katika eneo la Zanzibar.
Zaidi ya hayo, Serikali imenunua boti mbili (2) za kisasa; moja ya uokozi yenye uwezo wa kuokoa watu wapatao mia nne (400)
kwa wakati mmoja na nyengine ya kuzimia
moto baharini, ambayo hivi sasa inasimamiwa
na Kikosi chetu cha Zimamoto na Uokozi, kwa ajili ya kukabiliana na majanga ya
moto baharini.
Ndugu
Washiriki,
Katika kukabiliana na maafa yanayotokana na mvua
pamoja na mafuriko, hivi sasa Serikali ya Mapinduzi ya Zanzibar inaendelea na
ujenzi wa nyumba za wananchi walioathiriwa na Mvua za Masika za mwaka
2017, katika maeneo ya Nungwi kwa Unguja
na Tumbe kisiwani Pemba, ambapo jumla ya nyumba 30, msikiti, skuli, kituo cha
afya na soko vitajengwa katika maeneo hayo.
Serikali imekuwa ikitekeleza
Mradi wa Kuendeleza Huduma Mjini (ZUSP) unaotekelezwa kwa mkopo wa Benki ya
Dunia wenye jumla ya Dola za Marekani Milioni 93, ambapo mambo kadhaa
yanatekelezwa pamoja na kuondoa tatizo la mafuruiko katika maeneo yote
yanayokumbwa na maafa hayo katika mji wa
Zanzibar. Kwa hivyo, utekelezaji wa mradi huu umejumuisha ujenzi wa misingi mine mikubwa ya
kuondoa maji ya mvua na kuyapeleka baharini kutoka kwenye maeneo yenye kukumbwa
na mafuriko wakati wa mvua kubwa. Hivi
sasa, utekelezaji wa mradi huo umeshafikia zaidi ya asilimia 90 na tunatarajia
maji hayatotuama tena katika maeneo hayo na mafuriko hayatotokea.
Ndugu
Washiriki,
Mafanikio haya ni matunda ya jitihada za Serikali na
wananchi ambazo zinaungwa mkono na Taasisi na Jumuiya mbali mbali za Kimataifa.
Serikali ya Mapinduzi ya Zanzibar
itaendelea kushirikiana na SADC
katika utekelezaji wa mipango mbali mbali yenye lengo la kuimairsha namna ya
kujikinga na maafa katika nchi wanachama. Imani ya wananchi wa Zanzibar na
Jamhuri ya Muungano wa Tanzania ni
kwamba, tutaendelea kushirikiana na nchi wanachama wa SADC katika masuala muhimu ya maafa, ili tuwe na mfumo endelevu
wa kukabiliana na maafa katika ngazi zote.
Tuna jukumu la kuendelea kushirikiana kati ya
Serikali zetu, Mashirika ya Umoja wa Mataifa na Kimataifa, Taasisi za Utafiti,
Sekta Binafsi, Taasisi za Kidini, Taasisi za Fedha na Mashirika yasiyo ya Serikali, Asasi za Kiraia
na Vyombo vya Habari katika suala hili. Tukifanya hivyo, itakuwa tumeitekeleza
kwa vitendo kaulimbiu ya mkutano huu isemayo: “Ushiriki wa kisekta kwenye kupunguza madhara
ya maafa ni njia bora ya kujenga uhimili katika ukanda wa nchi wanachama wa
Jumuiya ya Maendeleo Kusini mwa Afrika.” Vile vile tuhakikishe kwamba tunaandaa na tunautekeleza mfumo
mzuri wa kutoa mafunzo na kubadilishana
uzoefu baina ya wataalamu wa nchi
wanachama wa SADC , katika masuala mbali mbali yanayohusu maafa.
Naamini kwamba
mkutano huu utapitisha maazimio
ambayo yatatuongoza katika juhudi zilizopo za kuimarisha ushirikiano
wetu katika masuala ya maafa pamoja na kuongeza ushawishi kwa nchi wanachama
kuwekeza zaidi kwa ajili kuimarisha
mifumo ya utoaji wa tahadhari,
kuimarisha teknolojia ya kuufahamu mfumo
wa hali ya hewa, kuimarisha vituo na
vifaa vya uokozi, kutenga maeneo ya kukimbilia na kujihami wakati wa dharura
katika nchi zote wanachama na kuwa na utaratibu wa kushirikiana kwa wataalamu,
vifaa pamoja na misaada ya kibinadamu.
Ndugu
Washiriki,
Kabla sijamalizia hotuba yangu, nataka
nikujuuilisheni ndugu zangu, wajumbe wa Mkutano huu, kwamba tunaandaa mpango wa
mafunzo kwa ajili ya walimu wa kwenda
kusomesha Kiswahili katika mataifa yenu, tukitilia maanani kwamba tayari lugha
ya Kiswahili ilichaguliwa kuwa miongoni mwa lugha za mawasiliano katika
mikutano ya Jumuia ya Nchi za SADC. Kwa hivyo, nakuhamasisheni ndugu wajumbe wa
Mkutano, muwalete walimu wenu, ili waje
wajifunze Kiswahili hapa Zanzibar.
Chuo Kikuu
cha Taifa cha Zanzibar kinaendesha mafunzo ya Kiswahili kuanzia elimu ya Cheti
hadi Shahada ya Uzamivu (Ph.D).
Namalizia hotuba yangu kwa
kukutakieni mshiriki vizuri katika mkutano huu, ili kwa pamoja tuweze
kuyafikia malengo yaliyopangwa. Kwa mara nyengine, natoa shukurani kwa Kamati ya Maandalizi ya Mkutano huu kwa kuamua kuufanya Mkutano huu hapa Zanzibar na
kunialika niwe Mgeni rasmi. Tunakukaribisheni nyote Zanzibar wakati wote
kwa moyo mkunjufu.
Nnakukumbusheni msikose kuitumia fursa ya kushiriki katika mkutano huu bila ya
kutembelea vivutio vyetu vya utalii, pamoja na Mji Mkongwe, ili mzidi kuifahamu
historia ya Zanzibar na watu wake. Karibuni sana.
Napenda kuchukua fursa hii
kumpongeza Rais wa Jamhuri ya Muungano wa Tanzania Dk. John Pombe Magufuli kwa
kuiongoza vyema nchi yetu kwa mafanikio makubwa na kwa sababu alikabidhiwa
rasmi uongozi na Jumuiya hii wa kuwa Mwenyekiti wa SADC, nampongeza kwa kaanza
vizuri, sina shaka na mafanikio tutakayoyapata katika uongozi wake, Rais
Magufuli ni muadilifu katika kuoingoza nchi hii kwani ndani ya miaka minne ya
uongozi wake Tanzania imeweza kupata mafanikio makubwa na kujijengea sifa
kubwa.
Baada ya kusema hayo, natamka kwamba Mkutano wa Kamati ya Mawaziri wa
Jumuiya ya Maendeleo Kusini mwa Afrika (SADC) wenye dhamana ya Menejimenti ya Maafa umefunguliwa rasmi.
Ahsanteni kwa kunisikiliza.
Facebook Blogger Plugin by Piere
Post a Comment