 |
| Bi Safia Nassor Mbarouq akiwa na mtoto wake Arafat Makame Yussuf pamoja na wajuu zake |
“Ndoto zangu za kuwa na familia yenye wasomi zilizimika rasm mnamo
miaka ya 2000, baada ya mume wangu kunipa talaka pamoja na kuniwachia ulezi wa
watoto wanane peke yangu hali ya kuwa sikuwa na kazi ya kuajiriwa wala
kujiari”.
Hiyo ni kauli ya huzuni ya Bi Safia Nassor Mbarouq (59) mkaazi wa
Masingini Wilaya ya Magharib ‘B’ Mkoa wa Mjini Magharib Unguja, ambaye bado ana
ndoto za kuwa na familia yenye masomi bora pindi akipata msaada wa kusomeshewa
watoto wake .
Alisema kabla ya ndoa yake kuvunjika alikuwa na matumaini mazuri ya
watoto wake kupata elimu bora, kutokana na mashirikiano mazuri aliyonayo kati
yake na mumewe wakati wawapo ndani ya ndoa hiyo iliyodumu kwa zaidi ya miaka
10.
Alisema licha ya mumewe kutokuwa na uwezo mkubwa kifedha ila walikuwa
wanaishi katika mazingira mazuri ya kuelewana, ila ghafla mumuwe huyo alianza
kubadilika tabia kidogo kidogo hatimae kufikia maamuzi ya kumpa talaka.
“Licha ya talaka kuwa na maumivu yake lakini maumivu makubwa
niliyoyapata baada ya kunipa talaka aliniamuru kuodoka na watoto wangu, hali
ambayo ilinifanya kutoamini kilichotokea ila niliamini, hasa kwa kuwa tayari
ameshaniacha”alisema.
Aliongeza kusema kuwa “Nilitamani watoto niwaache lakini kutokana na
machungu ya uzazi nililazimika kuwachukuwa watoto wangu wote licha ya kuwa
ninapokwenda sijui nitafikia wapi mimi pamoja na watoto wangu wote”alisema.
Kuanza maisha mapya
Bi Safia ambaye ni mzanzibar lakini alikuwa ameolewa jijiji Dar es Sallam anasema baada ya
kupewa talaka ilimlazimu kufungisha kila kilicho chake na kurudi zake Zanzibar
ambako ndio nyumbani kwao.
“Sikuweza kurudi katika nyumba za ndugu zangu wa familia kutokana wao
wenyewe maisha yao ni duni, nilianza kuhangaika kutafuta sehemu ya kukaa ila
nashukuru nilipa nyumba eneo la Mwera ambayo nilikodoshwa kwa njia ya msaada
maana fedha nilizokuwa natoa haziendani na malipo halisi ya kodi”alisema.
Alisema maisha ya hapo hayakuwa ya kudumu kwani baada ya kipindi
mwenye nyumba alitaka nyumba yake na alitafuta sehemu yenyengine ya kujihifadhi
yeye na watoto wake maeneo ya huko huko Mwera Wila ya Magharib ‘B’ Unguja.
“Hadi sasa nimeshakaa katika nyumba sita zote ni sawa na kuazimwa tu
maana baadhi huambiwa nilipe japo hela ndogo na nyengine huekwa bure kama
mlinzi tu wa nyumba hizo ambazo nyingi huwa zimo katika harakati za
ujenzi”alisema.
Bi Safia ambaye hivi sasa anaishi maeneo ya Mwera Masingini katika
nyumba ya kuazimwa yeye pamoja na watoto wake anasema bado akili yake
haijatulia vyema hasa kwa kuwa hadi wakati huu hana sehemu ya uhakika ya kuishi
yeye pamoja na familia yake.
Harakati za kutafuta maisha
Bi Safia anasema licha ya kupata hifadhi katika nyumba mbali mbali
lakini suala la chakula pamoja na elimu kwa watoto wake lilikuwa ni gumu sana
hasa kwa kuwa yeye ndio alikuwa ni mama na baba wa watoto hao hasa kwa kuwa
baba wa watoto hao hakuwa na msaada hata kidogo.
Alisema licha ya kufanya mawasiliano nae lakini hakukuwa na msaada
hata kidogo kwa watoto wake hao, ni yeye mwenyewe alikuwa anapambana kwa
kufanya kila aina ya kazi ili kuona watoto wake wanapata mlo japo mmoja kwa
siku.
“Sikuwa na kazi maalum hadi hii leo, kazi yangu wakati mwengine ni
kutafuta vibarua vya kuuza mama ntilie au kubanja kokoto (kubanja mawe) na
kuuza kwa watu wanaojenga,nashukuru huwa napata alau pesa”alisema.
Anasema kutokana na ukali wa
maisha, alifanya mawasiliano na dada wa aliyekuwa mumewe ambaye alikuwa naishi
Dar es Sallam, lengo ni kutaka msaada, hatiamae ombi lake lilikubaliwa.
Anasema Wifi yake huyo alikuwabali kuwachukuwa watoto wawili kati ya
nane alionao kwa lengo la kuwalea ili kumpunguzia ulezi, kitendo ambacho kilimpa
faraja kiasi.
“Nashukuru wifi yangu huyo aliwachukua tangu wadogo hadi sasa
wamefikia kidatu cha tatu, ila hivi karibuni ameshafariki dunia, hivyo watoto
wangu hivi sasa wapo huko huko Dar es Sallam kwa jamaa zao ila hawaendelei na
masomo, kutokana na aliyekuwa akiwalipia ameshafariki na hakuna aliyejitokeza
kuwaendeleza na masomo hadi sasa”alisema kwa huzuni.
Anasema kwa upande wa watoto anaoendelea kuwalele yeye ni mtoto mmoja
tu ambaye amefikia elimu ya kidato cha nne ambaye alifanya mitihani yake
mwishoni mwa mwaka uliopita wa 2019, na hivi sasa anasubiri matokeo.
Alisema watoto wake wengine wanatano hakuweza kupata elimu
vyema,kutokana na changamoto za kimaisha ila bado ana matumaini wanaweza kusoma
pindi akijitokeza mtu au taasisi itakayomuunga mkono katika malezi.
“Kwa sasa sitamaini ndoa hata kidogo na naichukukia kabisa,
ninachotamani ni kuona watoto wangu wanakuwa na elimu ili wawe msaada kwangu”alisema.
Bi Safia mwenye watoto nane wakiwamo sita wanawake na wawili wanaume
ambapo mtoto wa mwanzo anakadiriwa kuwa na umri wa miaka 30 na wa mwisho ana
miaka 16, anasema hawezi kukaa mbali na watoto wake hao hata kidogo ijapokuwa
hali ya maisha ni ngumu.
Anasema licha ya kutamani kupita katika vyombo vya sheria pamoja na
taasisi mbali mbali za kuisheria ili kumsaidia tatizo lakino hilo lakini
amekuwa akikosa kufanya hivyo kutokana na ukosefu wa mtu wa kumuongoza kufanya
hivyo.
“Natamanai sana kufika katika maeneo ya kisheria ili kudai haki ya
malezi kutokana na aliyekuwa mume wangu lakini sina mtu wa kuniongoza, kwani
mimi mwenyewe muda mwingi nimekuwa napambana na utafutaji wa maisha’alisema.
Mmoja watoto wa Bi Safia, Arafat Makame Yussuf alisema kiukweli maisha
wanayoishi ni magumu hivyo aliomba jamii kutoa misaada kwa upande wao hasa katika
suala la elimu pamoja na makaazi ambayop ni muhimu katika kuwa na maisha ya
uhakika.
Naye Afisa Sheria
kutoka chama cha Wanasheria wanawake Zanzibar (Zafela), Khadija Mbarouk Hassan
alisema kwa mujibu wa sharia ya mtoto namba 6 ya mwaka 2011, utelekezaji au
udhalilishaji wa mtoto ni kosa kisheria na mtendaji anastahiki kuchukuliwa
hatua za kisheria.
Alisema wao kama
cha cha wanasheria wanawake ambao mara nyingi hutetea wanawake na watoto
wamekuwa wakifanya jitihada mbali mbali za utatuzi wa migogoro ya kindoa
ikiwamo malezi kwa wato wote.
Alisema kinachotakiwa
kwa wananchi hasa wanawake wanaopata matatizo ya kindoa kufika katika ofisi zao
ili kueleza kilichowakuta, hatimae uongozi wa Zafela utachukua jitihada za
usaidia wake kama inavyofanya, lengo ni kuona haki inatendeka.
Alisema katika
kuhakikisha wanatoa msaada kwa jamii wameanzisha wasaidizi wa Sheria Wilaya
ambao kazi yao ni kukusanya taarifa za matukio hayo, hivyo ni vyema wananchi
hasa wanawake kuwatumia wasaidizi hao ili kupata msaada kwa mujibu wa shida za
kisheria walizonazo.
Kwa upande wa
aliyekuwa Mume wa Bi Safia, Makame Yussuf akizungumzia mkasa huo alisema sababu
kuu ya kuachana na mkewe huyo ni yeye baada ya kuongeza mke wa pili ndipo Bi
Safia aliamua kudai kuachwa na ndipo yalipofikia maamuzi ya kuachana.
Alisema baada ya
kuachana naye Bi Safia alichukua maamuzi ya kuondoka na watoto, kutokana na hasira
ila Makame alidai kuwa hakusita kutoa msaada pamoja na ushirikiana nae kwa hali
na mali pale unapohitajika licha ya kuwa walikuwa wameshaachana.
Alisema kwa kuwa
tayari wameshaachana hawezi kutoa msaada mkubwa kama walivyokua pamoja ndani ya
ndoa, ila pale unapohitajika msaada wake hasa kwa watoto wake huwa tayari
kutoa.
Makame alisema
kuwa kwwa kuwa wameshaachana hawezi kufatilia maisha yake ya wapi anaishi au
wanaishi vipi, ila kikubwa anashukuru alikaa nae vyema ndani ya ndoa na hawezi
kusitisha mahusiano yake mema ya kusaidiana hasa kwa kuwa tayari wameshazaa .
Imeandikwa na Haji M. Mohd, chini ya ufadhili wa UNICEF
Imeandikwa na Haji M. Mohd, chini ya ufadhili wa UNICEF
Facebook Blogger Plugin by Piere
Post a Comment